بارەگایێ بارزانی د راگەھاندنەکێدا دیارکر، ل ڤان نێزیکان بەرگێ پێنجێ یێ زنجیرا پەرتۆکا بارزانی و بزاڤا رزگاریخوازا کورد ژ نڤیسینا سەرۆک مەسعود بارزانی ل ژێر ناڤو نیشانێ “ڕاپەڕین، دەرفەت و ئاستەنگ” دێ کەڤیتە بەر دەستێ خواندەڤانان.
بارەگایێ بارزانی ئاماژە کرییە، پەرتۆکا “ڕاپەڕین، دەرفەت و ئاستەنگ” ژ 832 لاپەڕان و 20 پشکێن جودا پێکھاتییە و رۆناھی ئێخستییە سەر قۆناغەکا گرنگ یا خەباتا گەلێ مە.
ھەر وەسا ئاشکرا کرییە، پەرتوکا ڕاپەڕین بەرهەمێ یاداشتێن ڕۆژانەیێن ژیانا سەرۆك بارزانییە د ناڤبەرا سالێن 1991 تا 2002 و باس ل وان روودانێن گرنگ دکەت یێن کو د سەرھلدان و سالێن پشتی سەرھلدانێ ل ھەرێما کوردستانێدا رووداین و ژیانا سیاسی و جڤاکی و ئابووری یا گەلێ کوردستانێ د پشکا کوردستانێدا برییە قۆناغەکا پێشکەڤتیتر.
بارەگایێ بارزانی راگەھاندییە، روودانێن گەلەک گرنگ وەک سەرھلدانا جەماوەری یا کوردستانێ، پلانا بەرەیێ کوردستانی و پێشمەرگە، ئازادکرنا باژێر و باژێرکێن کوردستانێ، بەرسینگـگرتنا رژێمێ و کوچا ملیۆنی یا گەلێ کوردستانێ و بەرەڤانییا پێشمەرگەی و بڕیارا 688 یا جڤاتا ئاسایشێ و پاشی ڤەکێشانا رژێمێ دەستپێکرنا دانوستاندنا دگەل رژێمێ، ھەر وەسا ھەلبژارتنێن سالا 1992 و بەرەڤ پێشڤەچوونا پێگەھێ ھەرێمایەتی و نیڤدەولەتی یێ ھەرێما کوردستانێ و بەرفرەھبوونا دەستکەفت و دوستایەتی و پەیوەندییان د پەرتۆکێ دا ھاتییە.
ئاشکرا کرییە، د ڤێ پەرتۆکا سەرۆك مەسعود بارزانیدا باس ل وان ئاستەنگ و گیروگرفتان ھاتییە کرن کو بووینە رێگر ل ھەمبەر گەلێ کوردستانێ، دۆرپێچکرن، دەستوەردانێن دەرەکی و شاشییێن ژمارەکا سەرکردێن سیاسی و شەڕێ خۆ کوژی و ھەڤرکی و گەفێن بەردەوام یێن ھەرێمایەتی و ڕەوشا نە جێگیر یا ئابووری و ب سەدان روودان و ئاستەنگێن دی، د ڤێ پەرتۆکێدا ئاماژە پێ ھاتینە کرن.
بارەگایێ بارزانی دیار کرییە ژی، د ڤێ پەرتۆکێدا کۆمەکا وێنێن گرنگ و دیرۆکی و 73 بەڵگەنامێن سیاسی و دیرۆکی د ناڤدا ھاتینە و ژێدەرێن گرانبھا یێن سیاسی و دیرۆکی بۆ خواندەڤان و ڤەکۆلەران و دیرۆکنڤیسان تێدا دیارکرینە.
