شاخەوان عەبدوللا: ھەتا رێکكەفتن نەھێتەکرن ژڤانێ ھەلبژارتنا سەرۆک کۆماری ناھێتە دیار کرن

ئاژانسا خانی ، تایبەت:

جێگرێ سەرۆکێ پەرلەمانێ عێراقێ ئاشکرا کر، بۆ دیارکرنا ژڤانێ ھەلبژارتنا سەرۆک کۆماری پەرلەمان چاڤەڕێی رێکكەفتنا لایەنێن سیاسییە و دبێژیت، بەری دیارکرنا سەرۆک کۆماری دڤێت بەربژارێ سەرۆک وەزیران بھێتە ئێکلا کرن.

د. شاخەوان عەبدولا، تایبەت بۆ ئاژانسا خانی دبێژیت” دەستەیا سەرۆکاتییا پەرلەمانی چاڤەڕێی رێکكەفتنا لایەنێن سیاسییە بۆ دیارکرنا ژڤانێ ھەلبژارتنا سەرۆک کۆمارێ عێراقێ، ھەتا لایەنێن سیاسی نەگەھنە رێکكەفتنێ ژڤانێ ھەلبژارتنا سەرۆک کۆماری ناھێتە دیارکرن، بەری بەربژارێ سەرۆک کۆماری بھێتە دیار کرن، پێدڤییە بەربژارێ سەرۆک وەزیران بھێتە ئێکلا کرن.

ناڤهاتی گۆت ژی” ئەم رێکێ نادەین پەرلەمانێ عێراقێ بھێتە بکارئینان بۆ ئێکلاکرنا ھندەک پرسێن سیاسی، نوکە دانوستاندن دھێنە کرن دناڤبەرا لایەنێن سیاسی ھەر دەمێ گەھشتنە ئەنجامەکی” پەرلەمان دێ لدۆر پرسا ھەلبژارتنا سەرۆک کۆماری و راسپاردنا سەرۆک وەزیران دێ کۆمبیت.