سەرۆکێ هەرێما کوردستانێ دیاركر: دڤێت زێده‌تر خزمه‌تا هه‌له‌بجه بهێته‌كرن، د ڤێ سالیادێدا داخاز ژ حكومه‌تا عیراقێ دكه‌ین وه‌ك ئه‌رك و پێگیریێن قانونى، شه‌هید و خێزانێن قوربانیێن نوكه د ژیانێدا ماین بهێنه قه‌ره‌بووكرن و نه‌هێنه پشتگوهاڤێتن، ھەمى پێنگاڤێن ب پارێزگاربوونا ھەلەبجە بهێنه ته‌مامكرن.
نێچیرڤان بارزانی، سەرۆکێ هەرێما کوردستانێ ئه‌ڤرۆ د په‌یامه‌كێدا راگه‌هاند: ئه‌ڤرۆ 16ێ ئادارێ بەژنا خوە ل ھەمبەر قوربانیێن هه‌له‌بجه دچەمینین، به‌رى 34 سالان د ترسناکترین تاوانێن دیرۆکێدا، بوونە قوربانێن دەستێ رژێما به‌عس یا عیراقێ ب ھزاران كه‌س بریندار و دەربەدەر بوون کو ھەر ئێك ژ وان چیرۆك و سەرھاتیەکا خەمگین ھەیە.
نێچیرڤان بارزانی گۆت: کارەساتا کیمیابارانكرنا ھەلەبجە بۆ ھەتا ھەتایێ سمبۆلا مللەتەکێ ستەملێکری و قوربانیە کو بتنێ تاوانا وان ئەو بوو ل سەر ئاخا خوە یا رەسەن و ل ژێر ئاسمانێ خوە دا، داخوازا ژیان وئازادی و دادوەریێ دکرن. مللەتەك کو رۆلەکێ مەزن د دیرۆك و شارستانیا دەڤەرێ دا هه‌یه و هه‌رده‌م دەستێ دۆستانیێ، مرۆڤپەروەریێ، ئاشتیێ، پێکڤەژیان و لێبۆرینێ بۆ ھەمیان درێژکرییە.
سەرۆکێ هەرێما کوردستانێ د په‌یاما خوه دا دیاركر: داخوازێ ژ جڤاکێ ناڤدەولەتی و جیھانا پێشکەفتى دکه‌ین دناڤ خەباتێن بەردەوام دا بن ژ بۆ ھندێ رێ نەھێتە دان کو کارەساتا ھەلەبجە ل چ جهێن دى ل سەر ئەردی دوبارە بن و چەکێ کۆمکوژ و بەرھەمئنینا وی ب تمامی بھێتە قەده‌غه‌کرن.
نێچیرڤان بارزانی، سەرۆکێ هەرێما کوردستانێ ل داوییا په‌یاما خوه دا راگه‌هاند: دوپاتدكه‌ین باشترین هه‌لكه‌فت، ئەوە کو ھەمى ھێز، ئالی و پێکھاتەیێن کوردستانێ ئێکرێز و ھەڤگرتی بن و پێكڤه کاربکن داکو ھەمى مافێن دەستوورییێن ھەرێما کوردستانێ ده‌ست بكه‌ڤن.
