ئه‌ڤرۆ مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل شانده‌كێ ئێكه‌تییا ئورۆپا كر” كو ژ ڤیلله ڤاریولا بالیوزێ ئێكه‌تیا ئورۆپا ل عیراقێ و ئان مێسكانه‌ن سه‌رۆكێ هنارتییێ شیره‌تكارێ ئێكه‌تییا ئورۆپا ل عیراقێ و به‌رپرسێ نڤێسینگه‌ها ئێكه‌تییا ئورۆپا ل هه‌ولێرێ و ژماره‌كا شیره‌تكاران پێكهاتبوون.
د كۆمبوونێ دا ئیدانه‌كرنا هێرشا مووشه‌كى یال سه‌ر هه‌ولێرێ و دووماهی گوهۆرینێن ره‌وشا سیاسى یا عیراقێ و پێنگاڤێن دستورى یێن پێكئینانا كابینا نوو و شه‌رێ تیرۆرێ و كێشا كوچبه‌ران هاته گه‌نگه‌شه كرن .
شاندێ ئێكه‌تیا ئورۆپا كورتیه‌ك سه‌باره‌ت كار و چالاكیێن خۆ ل هه‌رێما كوردستانێ ب تایبه‌تى د بیاڤێ هاریكاریكرن و چاكسازیێن حكومه‌تێ سه‌باره‌ت ب هێز كرن و باشتركرنا سیسته‌مێ بانكى و كاروبارێن هێزێن ناڤخۆ و پۆلیسێن چالاكیێن مه‌ده‌نى و به‌رهنگابوونا توندوتیژیێ و تاوانا رێكخراو و سپیكرنا پاره‌یی و كوچا نه‌یاسایی.
د ڤى بیاڤى دا شاندى ب سوپاسیڤه ئاماژه ب هاریكارى و هه‌ماهه‌نگیا به‌رده‌وام و هێزا حكومه‌تا هه‌رێما كوردستانێ كر ل گه‌ل بالیوزخانه و هنارتیێ شیره‌تكارێ ئێكه‌تیا ئورۆپا ل عیراقێ .
سه‌رۆكێ حكومه‌تێ سه‌ره‌رایى سوپاسیكرن و هاریكاری و پشته‌ڤانیا ئێكه‌تیا ئورۆپا به‌حسێ چاكسازیێن حكومه‌تا هه‌رێما كوردستانێ كر د بیاڤێن هه‌مه‌جورێن ئابوورى و بجهئینانا خزمه‌تگوزاریان و بكارئینانا ته‌كنه‌لۆجیایێ بۆ پیشڤه‌برنا شه‌فافیه‌تێ و رێگرتن ل هه‌ده‌ردانا سامانێ گشتى” سه‌رۆكێ حكومه‌تێ ئاماژه ب نه‌ده‌ستوریا بریارا دادگه‌ها فیدرالى كر ب تایبه‌تی د كه‌رتێ نه‌فت و گازا هه‌رێما كوردستانێ و دووپاتی ل مافێن ده‌ستورى یێن هه‌رێما كوردستانێ و چاره‌سه‌ركرنا كێشان دگه‌ل حكومه‌تا فیدرالی لسه‌ر بنه‌مایێ ده‌ستورى كر.
