سه‌رۆك بارزانی: پێدڤییه‌ هێزێن پێشمه‌رگه‌ى ته‌كتیكا خوه‌ بگهۆرن ژ به‌رگریكرنێ‌ بۆ ھێرشبرنێ

سه‌رۆك بارزانی، په‌یامه‌ك ده‌رباره‌یى هێرشا شه‌ڤا بورى ل  سه‌ر سه‌نگه‌رێن پێشمه‌رگه‌ى ل‌ قه‌ره‌سالم به‌لاڤكرییه‌ و تێدا راگه‌هاند،پێدڤییه‌ ھێزێن پێشمەرگێ کوردستانێ ئامادەکارێن زێده‌تر بكه‌ن و تەکتیکا شه‌رى بگهۆڕن و ژ ره‌وشا به‌رگریكرنێ بکه‌نه‌ ھێرشكرن بۆ سزادان و ژناڤبرنا تیرۆرستێن داعش.

ده‌قێ په‌یاما سه‌رۆك بارزانی:

ب ناڤێ خودایێ بەخشندە و میھرەبان

ب مخابنى ڤه‌ شه‌ڤا بورى ژ ئه‌نجامێ هێرشا تیرۆرستێن داعش بۆسەر سەنگەرێن پێشمەرگەى ل قەرەسالم ل سنورێ ده‌ڤه‌را پردێ ، ژمارەیەکا پێشمەرگەیان شەھید و برینداربوون، پرسە سەرەخۆشێن خوه‌ ئاراستەی مالبات و کەسوکارێن شەھیدێن ئەوێ هێرشا تیرۆرستی دکەم و خوه‌ ب هه‌ڤپشكێ خه‌ما وان دزانم ، ژ خودایێ مه‌زن دخوازم رۆحا شەھیدان ب بەھەشتا بەرین شادبکه‌ت و سەبر و ئارامیێ بده‌ته‌ کەسوکاریێن وان، ھیڤیا چاره‌سه‌ربوونێ بۆ برینداران ژى دخوازم.

جه‌ختێ ل هندێ ژى دكه‌مه‌ڤه‌ كو پێدڤییه‌ تولا خوینا شه‌هیدێن مه‌ ژ تیرۆرستان بهێته‌ ڤه‌كرن، ژ ئه‌گه‌رێ زۆر بوونا لڤین و هێرشێن تیرۆرستان ل ڤێ داویێ پێدڤییه‌ هێزێن پێشمه‌رگێ كوردستانێ ئاماده‌كاریێن زێده‌تر بكه‌ت و ته‌كتیكا شه‌رى بگهۆریت و ژ ره‌وشا به‌رگریكرنێ بکه‌نه‌ ھێرشكرن بۆ سزادان و ژناڤبرنا تیرۆرستێن داعش

ھەزاران سڵاڤ ل گیانێ پاکێ شەھیدێن شەڕی داعش و ھەموو شەھیدێن رێكا ئازادییا کوردستان.

مسعود بارزانی

٦ـی کانوونی ئێكێ ٢٠٢١