ده‌قێ په‌یاما سه‌رۆكێ حكومه‌تا هه‌رێما كوردستانێ ب هه‌لكه‌فتا جینۆسایدا ئێزدییان:
ئه‌ڤرۆ حه‌فت سال ب سه‌ر هێرشا دڕندانه یا تیرۆریستێن داعشێ دا بۆ سه‌ر خوشك و برایێن ئێزدی ل شنگالێ و ده‌وروبه‌ران ده‌رباز دبن كو ژ به‌ر وێ ئه‌گه‌رێ ب هزاران ئاكنجیێن وێ ده‌ڤه‌رێ كۆمه‌لكوژ، بێسه‌روشوون و ئاواره بوون.
جینۆسایدا ئێزدییان تاوانه‌كا دڕندانه‌یه كو هه‌ر د وژدانێ گه‌لێ كوردستانێ و مرۆڤاتییێ دا دمینیت، له‌وڕا پێدڤییه به‌رده‌وام ب رێز ڤه هه‌لكه‌فتا قوربانیێن وێ كۆمه‌لكوژیێ ل بیربینین، هه‌روه‌سا ب پێزانینێن مه‌زن ڤه هه‌لكه‌فتا قوربانیدانا هێزێن پێشمه‌رگه یێ، كوردستانێ د رزگاركرنا شنگالێ دا ب رابه‌راتییا سه‌رۆك مه‌سعود بارزانی ل بیر بینین.
مه‌سروور بارزانی د په‌یاما خوه دا دیار ژی كرییه، د ڤێ هه‌لكه‌فتا خه‌مگین دا دوپات دكه‌ین، حكومه‌تا هه‌رێما كوردستانێ دێ به‌رده‌وام بیت ل سه‌ر بزاڤێن ڤه‌گه‌ڕاندنا خوشك و برایێن ئێزدی یێن ئاوارره بۆ جهێن وان ب سه‌ربلندی و كاركرن د گه‌ل حكومه‌تا فیدرال و كۆمه‌لگه‌ها ناڤدوله‌تی ل پێناڤ ئاڤه‌دانكرنا شنگالێ و ده‌ڤه‌رێن دی یێن خوشك و برایێن ئێزدی.
سه‌رۆكێ حكومه‌تا هه‌رێمێ د تمامییا په‌یاما خوه دا دوپاتی ل بجهئینانا رێككه‌فتنا شنگالێ و باشتركرنا ره‌وشا شنگالێ كر ژ بۆ وێ یه‌كێ ئاواره ب سه‌ربلندی ڤه‌گه‌رنه وارێ خوه و وێ ده‌ڤه‌رێ ژی ئاڤه‌دان بكه‌ن، د هه‌مان ده‌م دا بزاڤێن زێده‌تر ژ بۆ دادگه‌هكرنا تاوانبارێن داعشێ و هه‌ڤالێن وان و ئاشكراكرنا چاره‌نڤیسێ ته‌مام یێ بێ سه‌روشوینان.
