مه‌سرور بارزانى دگه‌ل کونسوڵێ گشتیێ نووێ ئەمەریکا كۆمبوو

مەسرور بارزانی سەرۆکێ حکومەتا هەرێما کوردستانێ، پێشوازی ل رۆبەرت پالادینۆ کونسوڵێ گشتیێ نووێ ئەمەریکا ل هەولێرێ کر.

د دیدارەکێدا کو ڕۆب واڵەر کونسوڵێ گشتیێ به‌رێ یێ ئەمەریکا ئامادە بوو ، سەرۆکێ حکومەتێ پیرۆزباهییا دەستبکابوونا کونسوڵێ گشتیێ نوویێ ئەمریکا کر و ئامادەییا حکومەتا هەرێما کوردستانێ ژى بۆ هەر هه‌ڤکارییه‌كێ و هەماهەنگییەکا پێدڤى دەربڕی، هەروەسا سوپاسیا کونسولێ گشتیێ به‌رێ کر و هیڤیا سەرکەفتنێ بۆ خواست د ئەرکی وێ نوو دا.

کونسوڵێ گشتیێ نووێ ئەمەریکا ل هەولێرێ ، جەخت ل هندێ کر، کو هەرێما کوردستانێ ، هه‌ڤپەیمانییه‌کا ستراتیجییا ئەمریکایە ل ده‌ڤه‌رێ و وه‌ڵاتێ وى دێ  بەردەوام بیت ل پشتگیریکرنا هەرێما کوردستانێ ،  ب تایبەتی هێزا پێشمەرگەى. گوت ژى کاردکەین بۆ گه‌شه‌پێدانا زێده‌ترا  وەبەرهێنانا ئەمریکی ل هەرێما کوردستانێ.

پەیوەندیێن هەرێما کوردستانێ و حکومەتا فیدرالی و هەڵبژارتنێن  داهاتى یێن جڤاتا نوێنەرێن عێراقێ و دایەلۆگێن ستراتیجێن ئەمریکا و عێراقێ و گرنگییا پشكداریا کارا یا هەرێما کوردستانێ د وێ دایەلۆگێدا ، چەند تەوەره‌کێن دیێن دیدارێ بوون.