ژ ئه‌گه‌رێ رێك نه‌كه‌فتنێ ل سه‌ر ده‌ربازكرنا بۆدجا گشتى، په‌رله‌مانێ ئسرائیلێ هاته هه‌لوه‌شاندن.
په‌رله‌مانێ ئسرائیلێ ژ ئه‌گه‌رێ رێك نه‌كه‌فتنێ ل سه‌ر ده‌ربازكرنا بۆدجا گشتى یا سالا 2020 هاته هه‌لوه‌شاندن، ده‌رگه‌هـ بۆ هه‌لبژارتنا چارێ یا په‌رله‌مانى هاته ڤه‌كرن و پێدڤى یه د ده‌مێ دو سالان دا بهێنه‌كرن.
پشتى شكه‌ستنا هه‌ردو پارتێن لیكۆد، ب سه‌رۆكاتییا بنیامێن نه‌ته‌نیاهۆ و هه‌ڤپه‌یمانیا شین و سپى، ب سه‌رۆكاتییا بێنى گانتس ل ده‌ربازكرنا پرۆژه یاسایا بۆدجا گشتى یا سالا 2020، بۆ ده‌مێ دو حه‌فتیان په‌رله‌مانێ ئسرائیلێ هاته هه‌لوه‌شاندن.
ل گوره‌ى یاسایا ئسرائیلێ، پێدڤى یه هه‌لبژارتنێن گشتى ل بیست و سێى ئادارا سالا 2021 بهێنه‌كرن، ل گوره‌ى یاسایا هه‌لبژارتنا ئسرائیلێ ژى، دوماهى ده‌مێ دیاركرى بۆ په‌سه‌ندكرنا بۆدجا وه‌لاتى پێدڤی یه پشتى ده‌ربازبوونا سه‌د رۆژان ژ پێك ئینانا حكومه‌تێ بیت.
ل هه‌یڤا نیسانا ئه‌فساله و پشتى هه‌لبژارتنا سیێ یا په‌رله‌مانى، هه‌ردو پارتێن لیكۆد و هه‌ڤپه‌یمانییا شین و سپى، حكومه‌تا هه‌ڤپه‌یمانى پێك ئینا و تێدا رێكه‌فتن ل سه‌ر وه‌رگرتنا پۆستێ سه‌رۆك وه‌زیران ب دور، ل ده‌ستپێكێ بۆ نه‌ته‌نیاهۆ و د دووڤدا بو بێنى گانتس.
