نێچیرڤان بارزانی سه‌رۆكێ هه‌رێما كوردستانێ، پێشوازی ل محه‌مه‌د جه‌واد زه‌ریف، وه‌زیرێ ده‌رڤى یێ كۆمارا ئیسلامییا ئیرانێ و شاندێ ل گه‌ل دا كر، كو بالیۆزێ ئیرانێ ل ئێراقێ، سه‌ركونسولێ گشتى یێ ئێرانێ ل هەولێرێ، كۆنسولێ ئیرانێ ل سلێمانیێ و ژمارەكا كاربدەست و راوێژكارێن وەزارەتا دەرڤه یا ئیرانێ، پێكهاتبوون.
د وێ كۆمبوونێ دا جێگرێن سه‌رۆكى و ژماره‌كا به‌رپرسێن هه‌رێما كوردستانێ ئاماده بوون، نێچیرڤان بارزانی به‌حسێ په‌یوه‌ندیێن مێژوویی یێن هه‌رێما كوردستانێ و كۆمارا ئیسلامییا ئیرانێ و پشته‌ڤانییا به‌رده‌واما ئیرانێ بۆ هه‌رێما كوردستانێ ل ده‌مێن سه‌ختدا كرییه، گۆت ژى، هه‌رێما كوردستانێ دێ فاكته‌ر‌ێ ئارامى و سه‌قامگيریێ بیت، ب گرنگى و ل سه‌ر بنه‌مایێ جیرانییه‌كا باش و به‌رژه‌وه‌نديێن هه‌ڤبه‌ش، به‌رێ خوه د ده‌ینه په‌یوه‌ندیێن ل گه‌ل ئیرانێ.
محه‌مه‌د جه‌واد زه‌ریفى سه‌ره‌راى دووپاتكرنا حه‌زا وه‌لاتێ وى بۆ پێشخستنا په‌يوه‌نديێن مێژويى ل گه‌ل هه‌رێما كوردستانێ، نیگه‌رانىیا خوه به‌رامبه‌ر وان هێرشێن مووشه‌كی بۆ سه‌ر هه‌ولێرێ نیشان دا و جه‌خت ل سه‌ر هندێ كر، ئیرانێ دڤێت ئه‌ڤ ده‌ڤه‌ره یا ئارام و سه‌قامگیر بیت و هه‌بوونا سه‌قامگیریێ و په‌یوه‌نديێن ئابووری و بازرگانیێن باش، د به‌رژوه‌ندییا هه‌ردو لایاندایه.
