شه‌ر و په‌ڤچوون د ناڤبه‌را سوپایێ ئیراقێ و چه‌كدارێن پارتییا كاركه‌رێن كوردستانێ په‌كه‌كێ ل باشۆرێ چیایێ شنگالێ روودان و سوپایێ ئیراقێ مۆله‌تا 24 سه‌عه‌تان دایه په‌كه‌كێ چیایێ شنگالێ چۆل بكه‌ن.
حه‌یده‌ر شه‌شۆ، فه‌رماندارێ پێشمه‌رگه‌ى ل شنگالێ بۆ خانى نیوز راگه‌هاند، پشتى داوى هاتنا ژڤانێ چۆلكرنا شنگالێ ژ ئالیێ په‌كه‌كێ ڤه، سوپایێ ئیراقێ بزاڤ كرینه كۆنترۆلا چیایێ شنگالێ بكه‌ن، لێ چه‌كدارێن په‌كه‌كێ ژن و زارۆك ئیناینه د رێیا سوپایێ ئیراقێ دا و رێ نه‌دایه بچنه چهێن پێدڤى ب وێ یه‌كێ ژى ئالۆزى د ناڤبه‌را وان دا دروست بووینه.
حه‌یده‌ر شه‌شۆ ئاشكرا ژى كر، پشتى وان ئالۆزیان سوپایێ ئیراقێ مۆله‌تا 24 سه‌عه‌تان ب چه‌كدارێن په‌كه‌كێ دایه ده‌ڤه‌رێ چۆل بكه‌ن و ئه‌ڤشه‌ڤه سه‌عه‌ت 12 ئه‌و مۆله‌ت ب داوى دهێت.
ل گۆره‌ى گۆتنا حه‌یده‌ر شه‌شۆ، دبیت سوپایێ ئیراقێ و په‌كه‌كێ رێككه‌فتنه‌كا نهێنى هه‌بیت، ژبه‌ركو چه‌ندین جاره مۆله‌تا چۆلكرنا شنگالێ ب داوى دهێت و چ كاڤ د وارى دا نه‌هاتینه هاڤێتن و په‌كه‌كه هه‌ر ل جهێن خوه‌یه و ئه‌و ده‌ڤه‌ر چۆل نه‌كرییه.
پێشتر حكومه‌تا هه‌رێما كوردستانێ و حكومه‌تا فیدرال رێككه‌فتنه‌ك بۆ ئاساییكرنا ره‌وشا شنگالێ ئیمزا كربوو، لێ ژبه‌ر هه‌بوونا چه‌كدارێن په‌كه‌كێ و میلیشیایان ل شنگالێ تا نها ئه‌و رێككه‌فتن نه‌هاتیه بجهئینان.
