لژنا بلند یا ساخله‌مى و سلامه‌تییا نشتیمانى یا ئیراقێ بریار دا، ئه‌و وه‌لاتى و فه‌رمانبه‌رێن ڤاكسینێ كۆرۆنایێ نه‌وه‌رگرن، نابیت ده‌وامێ بكه‌ن و سه‌ره‌دانا وه‌زاره‌ت و فه‌رمانگه‌هێن حكومى بكه‌ن.
لژنا بلند یا ساخله‌مى و سلامه‌تییا نشتیمانى ب سەرۆكاتییا مستەفا كازمی، سەرۆكوەزیرێن ئیراقێ كۆم بوو و بریاردا، نابیت هه‌تا 20 مه‌ها نیسانێ ئه‌و فه‌رمانبه‌رێن ڤاكسین نه‌وه‌رگرت بن ده‌وامێ بكه‌ن و نابیت ئەو وه‌لاتیێن كارتا وه‌رگرتنا ڤاكسینى نه‌بیت سه‌ره‌دانا فه‌رمانگه‌هێن حكومى بكه‌ن، یێ سه‌رپێچیا رێكاران ژى بكه‌ت دێ ب نه‌هاتى هێنه هه‌ژمارتن.
وەزارەتا ساخله‌مى و ژینگه‌ها ئیراقێ دیار ژى كر، باشترین رێك ب كۆنترۆلكرنا ڤایرۆسێ كۆرۆنایێ وه‌رگرتنا ڤاكسینى یه و هه‌تا نها 152 هزار 962 كه‌سان ل ئیراقێ ڤاكسینێ كۆرۆنایێ وه‌رگرتییه.
ل ده‌سپێكا به‌لاڤبوونا ڤایرۆسێ كۆرۆنایێ هه‌تا نها 932 هزار و 899 كه‌س ل ئیراقێ و هه‌رێما كوردستانێ تووشى كۆرۆنایێ بووینه، 820 هزار و 532 كه‌س چاره‌سه‌ربووینه، 14 هزار و 757 كه‌سان ب ڤایرۆسێ كۆرۆنایێ گیانێ خوه ژ ده‌ست دایه.
