وەزیرێ ساخله‌میێ: سوبه‌ لژنا بلندا رووبرووبوونا كۆرۆنا دێ كۆمبیت و رێنمایێن نوو راگه‌هینیت

وەزیرێ ساخله‌مییا ھەرێما كوردستانێ راگەهاند؛ تووشبوون ب كۆرۆنایێ د زێده‌بوونێ دایه‌ و كوردستان د ره‌وشه‌كا خراب دایه‌.

د. سامان بەرزنجی، وەزیرێ ساخله‌مییا هه‌رێمێ راگه‌هاند؛ رێژا تووشبوونێ ب كۆرۆنایێ به‌رده‌وام د بلندبوون و دمه‌ترسییێ دایه‌، له‌ورا پێدڤى یه‌ رێكار بهێنه‌ تۆندكرن و‌ بجهئینانا وان ژ ده‌مێ بوورى یا جودا بیت.

گۆت ژى: سباهى ئه‌و وه‌كو لژنا بلند یا رووبرووبوونا كۆرۆنایێ دێ كۆمبن و پێشنیارێن خو‌ دێ به‌نه‌ ناڤا كۆمبوونێ و هیڤى دكه‌ن رێكار بهێنه‌ تۆندكرن.

دیار ژى كر، ل ده‌ستپێكێ رێكارێن دژى كۆرۆنایێ دێ هێنه‌ تۆندكرن و به‌رى بگه‌هینه‌ قۆناغا قه‌ده‌غه‌كرنا هاتنوچوونێ وان هنده‌ك رێكارێن دى هه‌نه‌ بگرنه‌ به‌ر كۆ كارتێكرنێ نه‌كه‌نه‌ سه‌ر ژیانا رۆژانه‌ یا وه‌لاتییان و ئومێده‌وارن خه‌لك پێگریێ بكه‌ن و د پابه‌ندی بریارێن وه‌زاره‌تا ساخله‌مییێ بن.