سەرۆکێ لژنا پیشەسازی و سامانێن سرۆشتی ل جڤاتا پارێزگەھا دھۆکێ، دیارکر تێبینی ل سەر جھێن دانانا پانزیخانا ھەنە کو گەلەک جھان پێدڤی یە پانزیخانانە بھێنەدانان و لێ نینە و پێدڤی زانی رێڤەبەرییا پلاندانانێ ب ڤی ئەرکی رابیت.
عەبدولسەمەد تێلی، سەرۆکێ لژنا پیشەسازی و سامانێن سرۆشتی ل جڤاتا پارێزگەھا دھۆکێ، ئەڤرۆ سێشەمبی رێکەفتی ١٦/٣/٢٠٢١ بۆ خانی نیۆز گۆت: بۆ دانانا ھەر پانزیخانەکێ دڤێت ژ کەسێ داخازا وەرگرتنا موولەتێ دکەت ژ رێڤەبەرییا پلاندانانێ دەست پێ بکەت و مەرجێن ڤەکرنێ ل وێ رێڤەبەریێ ھەنە، ئەڤە گرێدایی کارەکێ بازرگانی یە لێ دڤێت ل دووڤ مەرجێن دورست بیت، دڤێت ئەو جھێن پانزیخانە لێ بھێتەدانان مەترسی ل سەر ژیانا خەلکی دروست نەکەتن.
عەبدولسەمەدی ئەو ژی گۆت: مە تێبینی ل سەر دانانا پانزیخانا ھەیە وەک بەلاڤەکرنا وان نەیا دروستە ھندەک جادان گەلەک پانزیخانە تێدا ھەنە و ھندەک جھان ژی چ پانزیخانە لێ نینن، بەردەرش ھەتا دگەھیتە کەلەکچی چ پانزینخانە لێ نەھاتینەدانان، دڤێت مەرجەک ھەبیت جھێ پێدڤی نەبیت پانزیخانە تێدا نەھێـتەدانان، چنکو دانانا پانزیخانا پێدڤی ب رازیبوونا ١٨ فەرمانگەھانە وەک ژینگەهـ و بەرگرییا شارستانی و گەلەک فەرمانگەھێن دیێن پەیوەندار.
