وەزارەتا نەفتا ئیراقێ، قەبارێ ھنارتنا نەفتا خاڤ یا ھەیڤا بوری بەلاڤکرییە و دبێژیت: تێکرایا ھەر بەرمیلەکێ نەفتێ ب زێدەتر ژ ٥٣ دۆلاران فرۆشتییە.
ئەڤرۆ دووشەمبی ١ شوواتێ ٢٠٢١ێ، وەزارەتا نەفتا ئیراقێ د راگەھاندنەکێ دا بەلاڤکرییە، ل دووڤ ئامارێن بەراھیێ یێن کۆمپانیا بازارکرنا نەفتا ئیراقێ، ھنارتنا نەفتا خاڤا ئیراقێ د ھەیڤا کانوونا دووێ یا بوری ب ٨٨ ملیۆن و ٩٢٢ ھزار و ٦٩٧ بەرمیلان بوو، داھات ژی نێزیکی چوار ملیار و ٧٣٩ ملیون و ٨٢ ھزار دولاربوون.
ھەر وەکو د راگەھاندنێ دا ھاتی، د ھەیڤا بوری دا سەرجەمێ گشتیێ ھنارتنا نەفتا خاڤ ل کێلگەھێن نەفتا باشوور و ناڤەراست گەھشتییە نێزیکی ٨٥ ملیۆن و ٨٧٠ ھزار و ٥٠٣ بەرمیلێن نەفتێ، ھنارتن ژی ل کیلگەھێن کەرکووکێ بۆ بەندەرێ جەیھانا تورکی سێ ملیۆن و ٥٢ ھزار و ١٩٤ بەرمیل بوون.
ب شێوەیەکی کو تێکرا رۆژانە دوو ملیۆن و ٨٦٨ ھزار بەرمیلێن نەفتێ ھاتینە ھنارتن و تێکرایا بھایێ ھەر بەرمیلەکێ نەفتێ ژی ٥٣.٢٩٤ دولار بوون.
